இந்நிலையில், கடந்த வாரம் தொண்டாமுத்தூர் பகுதியில் சுற்றி வந்த ரோலக்ஸ் என்ற ஆண் காட்டு யானை வனத் துறையினரால் மயக்க ஊசி செலுத்தி பிடிக்கப்பட்டு, ஆனைமலை புலிகள் காப்பகம் டாப்ஸ்லிப் வரகளியார் யானைகள் முகாமில் உள்ள மரக்கூண்டில் அடைக்கப்பட்டது. ஒரு சில வாரங்களுக்கு பிறகு இந்த யானை மற்றொரு வனப் பகுதியில் விடப்படும் என வனத்துறை அதிகாரிகள் தெரிவித்துள்ளனர்.இந்நிலையில் நேற்று தொண்டாமுத்தூர் அருகே உள்ள குப்பேபாளையம் வனப் பகுதியில் இருந்து வெளியேறிய ஒற்றை ஆண் காட்டு யானை அங்கு உள்ள நாகராஜன் என்பவரது விளை நிலத்திற்குள் புகுந்து மற்றொரு தோட்டத்திற்கு செல்ல முயன்றுள்ளது. அந்த இடத்தில் மின்கம்பம் இருந்ததால் அதன்மீது சாய்ந்து நின்றதாக தெரிகிறது. கடந்த சில தினங்களாக பெய்த கனமழை காரணமாக அந்தப் பகுதி முழுவதும் சேறும் சகதியுமாக இருந்ததால் யானை புதிதாக நிறுவப்பட்ட மின்கம்பம் மீது விழுந்ததாக தெரிகிறது. இதனால் உயர் அழுத்த மின்சாரம் தாக்கி அந்த யானை சம்பவ இடத்திலேயே பரிதாபமாக உயிரிழந்தது.இன்று அதிகாலை நாகராஜன் குடும்பத்தினர் வீட்டிற்கு வெளியே வந்த போது யானை உயிரிழந்து கிடப்பதையும், மின்கம்பம் சாய்ந்து கிடப்பதையும் பார்த்து போளுவாம்பட்டி வனத்துறையினருக்கு தகவல் அளித்தனர். தகவலின் பேரில் போளுவாம்பட்டி வனச்சரகர் ஜெயச்சந்திரன் மற்றும் மாவட்ட வன அலுவலர் ஜெயராஜ் ஆகியோர் சம்பவ இடத்திற்கு விரைந்து வந்து விசாரணை மேற்கொண்டனர். தொடர்ந்து, உயிரிழந்த யானையின் உடலை பிரேதப் பரிசோதனை செய்ய முடிவு செய்யப்பட்டுள்ளதாக வனத்துறைனர் தெரிவித்துள்ளனர்.
