ஆண்டுதோறும் வெயில் காலங்களில் ஏரி தூர்வாரப்பட்டு, நீர்சேர்த்து வைக்கப்பட்டு அந்த நீரை விவசாயிகள் 3 போகம் பயன்படுத்தி வந்தனர். ஆனால், இந்த ஆண்டு ஏரியை தூர்வாரத்தால் லேசான மழைக்கே ஏரி நிரம்பி கலங்கள் வழியாக தண்ணீர் வெளியேறி வருவதாக விவசாயிகள் குற்றம்சாட்டியுள்ளனர். தற்போது, ஏரியில் இருந்து வெளியேறப்படும் நீரில் 500 கனஅடி நீர் நேரடியாக செம்பரம்பாக்கம் ஏரிக்கு செல்வதால், செம்பரம்பாக்கம் ஏரிக்கு நீர்வரத்து அதிகரித்து வருகிறது.இது குறித்து பேசிய விவசாயி கந்தசாமி, ஸ்ரீபெரும்புதூர் வட்டத்தில் அதிகப்படியாக தொழிற்சாலைகள் இயங்கி வருகின்றன. அதில் இருந்து வெளியேறும் கழிவுகள் நீரில் கலக்கப்படுகின்றன. இந்நிலையில் விளை நிலங்களுக்கு தேவைகான வளமான தண்ணீரை தரும் ஏரியாக பிள்ளைப்பாக்கம் ஏரி இருந்தது. ஆனால், பருவ மழை தொடங்க உள்ளது தெரிந்தும் ஏன் ஏரியை தூர்வாரவில்லை என தெரியவில்லை. இப்போது பருவ மழையின் நீரை சேமிக்க முடியாமல் வெளியேற்றப்பட்டு வருகிறது. இதனால் விவசாயிகள் பெரும் அவதிக்குள்ளாகியுள்ளோம். இப்போது தான் மழை தொடங்கியுள்ளது. இன்னும் இரண்டு மாதங்கள் மழை பெய்ய உள்ளது. அதற்குள் ஏரியின் நீர்வரத்து அதிகரித்தால் நிலைமை மோசமாகிவிடும். நினைத்தாலே பயமாக உள்ளது.நீர்வளத் துறையினர் முறையாக இதனை கையாளவில்லை. அரசு ஏரிகளையும், அங்கிருக்கும் மதுகுயையும் முறையாக பராமரிக்கப்படுவதை கண்காணிக்க வேண்டும். விவசாயிகளின் வாழ்வாதாரத்தை காக்க அரசு முன்வர வேண்டும் என மாவட்ட நிர்வாகத்திற்கு வேண்டுகோள் விடுத்தார்.
